Mara nyingi watu wanapoingia kwenye biashara hujikuta wakiona matumaini yale hayawezekani tena. Hii inatokana na kukutana na uhalisia wa kibiashara tofauti na kile walichokuwa wanafikiria kabla ya kuingia. Na mara nyingi matumaini haya hufa kutokana na soko la biashara kutokuwa la uhakika.
Kama wewe upo kwenye biashara, au una mpango wa kuingia kwenye biashara, hapa kuna maswali muhimu sana ya kujiuliza kuhusu soko la biashara yako. Kumbuka kwamba bila ya mteja wewe huna biashara, hivyo unavyojua zaidi kuhusu wateja wako ndivyo unavyoijua zaidi biashara yako.
Yafutayo ndiyo maswali ya kujiuliza wakati wa kuingia kufanya biashara:
Je biashara ninayotaka kufanya ina wateja?
Hili ni swali ambalo huwezi kuliruka. Ni lazima ujiridhishe kwamba kuna wateja wa biashara yako ili uweze kuendesha biashara husika.
Utajuaje kama kuna wateja wa biashara yako?
Angalia watu wenye shida ambayo biashara yako inaweza kutatua
Angalia mahitaji ya watu ambayo wanayakosa kwenye biashara zilizopo sasa.
Sikiliza malalamiko ya watu kwenye aina ya biashara unayofanya. Kama jibu ni ndio kuna wateja ndio unaweza kuendelea mbele. Kama jibu ni hapana, rudi kwenye meza na boresha wazo lako la biashara.
Je soko lina ukubwa wa kutosha?
Baada ya kujua kwamba kuna wateja wa biashara yako, pia unahitaji kujua kama wateja hawa ni wengi kiasi cha wewe kuweza kuendesha biashara yako vizuri. Unaweza kuwa na wazo zuri sana la biashara na kweli kukawa na wateja ila wateja wenyewe ni wachache kwa wewe kuweza kuendesha biashara yenye faida.
Hakikisha una soko la kukutosha ili uweze kufidia gharama zako za kuendesha biashara na kuweza kupata faida pia.
Je soko linafikika kwa urahisi?
Unaweza kuwa na biashara ambayo ina wateja na wateja ni wengi ila kuwafikia wateja wako ikawa changamoto kubwa sana. Kama wateja wamesambaa sehemu mbalimbali na biashara yako ni ya kuhitaji uwe sehemu moja inaweza kuwa changamoto kubwa kwako. Unahitaji kuwa na biashara ambayo itakuwa rahisi kwako kuwafikia wateja wako ili kuweza kufanya nao biashara.
Angalau kwa kipindi hiki imekuwa rahisi sana kufanya biashara kwa maeneo mbalimbali ila bado kuna maeneo ambayo yana changamoto kubwa.
Usiingie kwenye biashara kabla hujajiuliza maswali hayo matatu. Na kama tayari upo kwenye biashara, jiulize maswali hayo matatu na uone ni jinsi gani unavyoweza kuiboresha biashara yako zaidi ili uweze kuikuza na kupata faida zaidi.
