Kikao cha Dharura chafanyika baada ya Machar kushindwa kwa mara ya pili kurejea Sudan kusini

Baraza la Usalama  la Umoja  wa Mataifa limefanya  kikao  cha dharura baada  ya kiongozi  wa  waasi nchini  Sudan  Kusini Riek Machar kushindwa  urejea Juba,  kama sehemu  ya mkataba wa  amani.

Kikao hicho  kiliitishwa  na Marekani  baada ya  Bwana  Machar  kushindwa  kwa  mara ya  pili  kurejea  nchini  Sudan kusini na  hivyo kuyapunguza  matumaini  ya kupiga hatua  ya kuvimaliza  vita  vya wenyewe kwa wenyewe vilivyo dumu kwa miaka miwili.

Kulingana  na  makubaliano hayo, kiongozi huyo  wa  waasi  alipaswa  kujiunga na  Rais Salva  Kirr katika  serikali mpya  ya mpito  ya muda wa  miezi 30 hadi  uchaguzi utakapofanyika.

Akizungumza na Kituo cha Al jazeera live Machar  mwenyewe amesema kuwa ameshindwa kurejea mjini Juba kutokana na ndege aliyotarajia kusafiria kukosa kibali cha kutua katika anga ya Sudan ya kusini.

Machar alitarajiwa kurejea nchini Sudan Kusini tangu siku ya jumatatu kuchukua wadhifa wake wa zamani wa makamu wa kwanza wa rais ambapo kiongozi huyo alitoroka mjini Juba mwaka wa 2013 baada ya rais wa nchi hiyo Salva Kirr kumtuhumu kuongoza jaribio la mapinduzi ya serikali yake.