Kinara wa upinzani nchini Kenya Raila Odinga amewathubutu polisi kumkamata leo huku akiahidi kuendelea na maandamano dhidi ya serikali ambayo mamlaka imeharamisha na pia kuashiria hatua kali zaidi za kukomesha maandamano ya kitaifa ambayo yamepangwa kufanyika mara mbili kila wiki.
Waziri wa Mambo ya Ndani Kithure Kindiki jana alitangaza kwamba serikali itashinikiza sheria mpya ya kuweka vikwazo kwa maandamano huku akisema polisi hawatavumilia kurudiwa kwa maandamano yenye ghasia.
Kindiki alitoa taarifa baada ya Inspekta Jenerali wa Polisi Japhet Koome kuwaonya viongozi wa upinzani kwamba watakamatwa kwani hajatoa ruhusa kwa maandamano hayo kufanyika
Baadhi ya wanasiasa wa Muungano tawala wa Kenya Kwanza wamemtaka kiongozi wa upinzani Raila Odinga kumpa Rais William Ruto muda wa kutekeleza mipango yake kwa nchi kabla ya kuhoji uwezo wake wa kuongoza.
Aidha walimtaka Inspekta Jenerali wa Polisi Japhet Koome kukabiliana vikali na maandamano dhidi ya serikali. Pia walitishia kufichua majina ya watu wenye ushawishi waliodai wanafadhili maandamano ambayo yametangazwa kuwa haramu na Huduma ya Kitaifa ya Polisi.
Jana, Bw Odinga pia alimkashifu Rais William Ruto, ambaye aliondoka nchini kwa ziara rasmi nchini Ujerumani, kwa kudai kuwa wito wake wa maandamano ulilenga kusababisha ghasia.
“Hatutaki kuleta machafuko katika nchi yetu. Lakini tunapigania haki zetu. Tuna haki ya kuwaambia Wakenya ukweli kwa sababu Biblia inasema ukweli utawaweka huru. Tuna haki ya kuandamana kwa amani,” alisema Waziri Mkuu huyo wa zamani.
0 Comments