Tume ya Ushindani (FCC) imepata ujuzi, maarifa na uzoefu muhimu kuhusu usimamizi wa ubora, viwango vya bidhaa na fursa za Biashara Ndogo, za Kati (MSMEs), kupitia ushiriki wake katika kongamano maalum lililohusu utoaji wa Tuzo za Ubora za Jumuiya ya Afrika Mashariki (EAC), lililofanyika sambamba na Maonesho ya 26 ya Biashara ya Wajasiriamali Wadogo na wa Kati wa Jumuiya ya Afrika Mashariki (EAC MSMEs Trade Fair) jijini Kigali, Rwanda.
Kongamano hilo lililojikita katika masuala ya ubora, viwango vya bidhaa na fursa kwa biashara ndogo na za kati katika ukanda wa Afrika Mashariki, liliipa FCC jukwaa muhimu la kujifunza kutoka kwa wataalam wa masuala ya ubora wa kikanda, kubadilishana uzoefu na kujifunza mbinu bora zinazoweza kusaidia kuimarisha utendaji wa Taasisi pamoja na utoaji wa huduma bora kwa Umma.
Ushiriki huo ulikuwa sehemu ya maadhimisho ya Burundi Day yaliyofanyika katika Maonesho ya 26 ya Biashara ya Wajasiriamali Wadogo na wa Kati wa EAC, yanayoendelea katika viwanja vya Gikondo Expo, jijini Kigali, kuanzia tarehe 30 Oktoba hadi 8 Novemba 2026. Maadhimisho hayo yalilenga kuonesha utajiri wa utamaduni wa Burundi, bidhaa zake na ubunifu katika ujasiriamali, huku yakitoa fursa kwa wadau wa kikanda kujadili viwango vya ubora, ushindani wa biashara na maendeleo ya uchumi.
Katika kongamano hilo, wawakilishi kutoka Sekretarieti ya Jumuiya ya Afrika Mashariki (EAC), Kituo cha Biashara cha Kimataifa (ITC) kupitia Programu ya MARK UP II, Bodi ya Viwango ya Rwanda (RSB), washauri wa masuala ya usimamizi wa ubora, waratibu wa Tuzo za Ubora za Taifa za Rwanda pamoja na washindi wa awali wa tuzo hizo, walitoa maelezo na uzoefu kuhusu mfumo wa Tuzo za Ubora za EAC na mchango wake katika kuimarisha utendaji na ushindani wa Taasisi na biashara.
Mada zilizowasilishwa zilijikita katika faida za kushiriki Tuzo za Ubora za EAC, fursa zinazopatikana katika biashara ndogo na za kati, sifa na vigezo vya kustahili kushiriki, makundi ya tuzo, vigezo vya tathmini pamoja na taratibu za maombi. Washiriki pia walipata mwongozo kuhusu mfumo wa tuzo hizo na namna ambavyo biashara zinaweza kuandaliwa na kukidhi vigezo vya kutambuliwa katika ngazi ya kitaifa na kikanda.
Uwasilishaji mwingine muhimu ulihusu Tuzo za Ubora za Taifa za Rwanda, ambapo washiriki walipata ufahamu kuhusu mchakato wa tathmini katika ngazi ya Taifa, uzoefu uliopatikana na uhusiano wa tuzo hizo na Tuzo za Ubora za Jumuiya ya Afrika Mashariki.
Aidha, kongamano hilo lilijumuisha mjadala wa jopo uliowakutanisha washindi wa awali wa Tuzo za Ubora za EAC, ambao walieleza mafanikio na uzoefu wa biashara ndogo na za kati kutoka Rwanda, Kenya na Tanzania. Uzoefu huo ulionesha namna ushiriki na kutambuliwa kupitia tuzo za ubora kunavyoweza kuleta mabadiliko chanya katika biashara kwa kuimarisha ufanisi wa shughuli, kuboresha ubora wa bidhaa na huduma, kuongeza ushindani na kufungua fursa katika masoko ya kikanda na kimataifa.
Kwa upande wa FCC, ushiriki katika kongamano hilo umekuja katika kipindi muhimu, kufuatia mafanikio makubwa ya Tume ya kuibuka mshindi wa jumla katika kipengele cha Ubora wa Huduma kwa Taasisi za Umma katika Tuzo za Ubora za Jumuiya ya Afrika Mashariki (EAC Regional Quality Awards 2026), zilizofanyika tarehe 2 Novemba 2026 jijini Kigali, Rwanda.
Tume inaona maarifa na uzoefu uliopatikana kupitia kongamano hilo kuwa fursa muhimu ya kuendeleza na kuimarisha dhamira yake ya usimamizi wa ubora, ubora wa kiutendaji wa Taasisi na maboresho endelevu katika utoaji wa huduma kwa Umma.
FCC inatarajia kutumia mafunzo na mbinu bora zilizoshirikishwa katika kongamano hilo kuimarisha mifumo yake ya usimamizi wa ubora, kuongeza ufanisi wa huduma za udhibiti wa ushindani, kuboresha ushirikishwaji wa wadau na kuimarisha uwazi pamoja na uwajibikaji katika utekelezaji wa majukumu yake.
Ushiriki huo pia umeimarisha uelewa wa Tume kwamba ubora si mafanikio ya Taasisi yanayopaswa kusherehekewa kwa kupata tuzo pekee, bali ni wajibu endelevu unaohitaji ubunifu, mifumo imara ya utendaji, upimaji wa matokeo na uwezo wa kuitikia mahitaji na matarajio ya wananchi.
Kama Taasisi yenye dhamana ya kusimamia ushindani wa haki na kulinda walaji, FCC inatambua kuwa utoaji wa huduma bora kwa Umma una nafasi muhimu katika kujenga imani ya walaji, kusaidia ukuaji wa biashara na kuweka mazingira ya soko lenye ushindani wa haki.
Vilevile, Tume inatarajia kuimarisha mchango wake katika kuhamasisha uzingatiaji wa viwango vya ubora miongoni mwa wafanyabiashara, hususan wajasiriamali wadogo na wa kati, kwa kuongeza uelewa kuhusu ushindani wa haki, ulinzi wa walaji, ubora wa bidhaa na mwenendo bora wa biashara. Jitihada hizo ni muhimu katika kusaidia biashara za ndani kuongeza ushindani na kutumia ipasavyo fursa zinazotokana na Soko la Pamoja la Jumuiya ya Afrika Mashariki.
Ushiriki wa FCC katika kongamano hilo, sambamba na kutambuliwa kwake kupitia Tuzo za Ubora za EAC za mwaka 2026, unaonesha umuhimu wa ushirikiano wa kikanda, kubadilishana maarifa na kujifunza kutoka kwa Taasisi na mashirika yaliyofanikiwa kuimarisha mifumo ya usimamizi wa ubora.
Tume inaendelea kujidhatiti kuhakikisha kuwa tuzo hiyo inakuwa chachu ya maboresho halisi yatakayowanufaisha walaji, wafanyabiashara na wadau wengine nchini Tanzania.
Katika hatua zinazofuata, FCC itaendelea kuimarisha uwezo wa Taasisi, kutumia teknolojia za kidijitali, kuboresha taratibu za utoaji wa huduma za udhibiti wa ushindani na kujenga utamaduni wa utendaji bora unaoweka ubora wa huduma kwa Umma kuwa kipaumbele.
Tume inaamini kuwa thamani halisi ya kupata Tuzo ya Ubora ya EAC haipo tu katika kutambuliwa kwa mafanikio yaliyofikiwa, bali pia katika uwezo wa kuyaendeleza mafanikio hayo, kuinua viwango vya huduma na kuhakikisha wananchi wanapata huduma zenye thamani zaidi.
Kupitia mafunzo endelevu, ubunifu na ushirikiano na Nchi Wanachama wa Jumuiya ya Afrika Mashariki, FCC imedhamiria kuendeleza mafanikio hayo na kuchangia kujenga Jumuiya ya Afrika Mashariki yenye ushindani imara, uwazi na utamaduni wa kuzingatia viwango vya ubora katika utoaji wa huduma na shughuli za kiuchumi.
