Mamia ya walinda amani wa Umoja wa Mataifa kutoka eneo la Tigray nchini Ethiopia wamekataa kurejea nyumbani kutoka Sudan kwa kuhofia usalama wao.
Walikuwa wametumwa Abyei - eneo la mpaka linalozozaniwa kati ya Sudan na Sudan Kusini.
Wanajeshi hao wa Ethiopia waliotumwa katika maeneo mengine ya bara hilo hapo awali walikataa kurejea nyumbani wakisema wanahofia kudhulumiwa na serikali mjini Addis Ababa kufuatia kuzuka kwa vita katika eneo la Tigray mnamo Novemba 2020.
Vita vya wenyewe kwa wenyewe vya Ethiopia vilivyodumu kwa miezi kumi na saba nchini humo vimesababisha maelfu ya watu kupoteza maisha na mamilioni kuhitaji msaada.
Makubaliano ya kibinadamu kati ya serikali na waasi wa Tigray yametajwa kuwa ni hatua muhimu ya kupata suluhu.
