Na Rebeca Duwe | Tanga
TANGA: Waziri wa Elimu, Sayansi na Teknolojia, Profesa Adolf Mkenda, amesema mageuzi ya elimu na ujuzi ni sehemu muhimu ya utekelezaji wa dhamira ya Rais Dkt. Samia Suluhu Hassan ya kujenga kizazi chenye uwezo wa kukabiliana na mahitaji ya sasa na ya baadaye.
Profesa Mkenda ameyasema hayo wakati wa uzinduzi rasmi wa Maonyesho ya Wiki ya Elimu, Ujuzi na Ubunifu, yanayofanyika kitaifa mkoani Tanga.
Amesema Serikali inaendelea kuimarisha elimu ya ujuzi kupitia shule za ufundi, ikiwemo Sekondari ya Ufundi Tanga, ili kuwaandaa vijana kuwa na ujuzi unaoendana na mahitaji ya soko la ajira na maendeleo ya Taifa.
Mageuzi ya elimu yataonekana baadaye
Profesa Mkenda amesema mageuzi ya elimu si jambo ambalo matokeo yake yanaweza kuonekana mara moja, bali yanahitaji muda kabla ya kuleta matokeo makubwa kwa jamii.
“Mageuzi ya elimu ni rahisi kuyasema kwa maneno, lakini matokeo yake ni makubwa. Hayawezi kuonekana leo wala kesho, badala yake yataonekana mbele ya safari.”
Amesema uwekezaji unaofanywa katika elimu na ujuzi ni maandalizi ya kizazi cha sasa na kijacho, ambacho kitakuwa na uwezo wa kukabiliana na changamoto pamoja na fursa zitakazojitokeza katika siku zijazo.
Elimu bila ada yaongeza fursa kwa wanafunzi
Kwa upande wake, Mkuu wa Mkoa wa Tanga, Balozi Dkt. Batilda Burian, amesema mpango wa elimu bila ada umeongeza fursa kwa wanafunzi nchini.
Amesema Serikali imeendelea kuboresha mazingira ya kujifunzia kwa kuongeza shule, madarasa, mabweni pamoja na walimu.
Balozi Burian amesisitiza umuhimu wa jamii kupata elimu na ujuzi unaoendana na fursa zilizopo katika sekta mbalimbali, ikiwemo viwanda, madini, uvuvi, mafuta na gesi pamoja na bandari.
Kwa mujibu wa Mkuu huyo wa Mkoa, sekta hizo ni miongoni mwa maeneo muhimu yanayoweza kuchochea maendeleo na kuongeza ustawi wa wananchi.
Tanga mwenyeji wa maonyesho kwa mara ya pili
Balozi Burian amesema Wiki ya Elimu, Ujuzi na Ubunifu imeleta faraja na tabasamu kwa wananchi wa Tanga, huku akiipongeza Wizara ya Elimu, Sayansi na Teknolojia kwa kuuchagua mkoa huo kuwa mwenyeji wa maonyesho hayo kwa mara ya pili.
Amesema maonyesho hayo yanatoa fursa kwa wananchi, wanafunzi, wabunifu na wadau mbalimbali kujifunza na kuona fursa zinazopatikana kupitia elimu, ujuzi na ubunifu.
Wizara kuweka mkazo katika biashara ya ubunifu
Awali, Katibu Mkuu wa Wizara ya Elimu, Carolyne Nombo, amesema lengo la maonyesho hayo ni kuwakutanisha wadau, washiriki, wizara na taasisi mbalimbali ili kubadilishana uzoefu na kuweka mikakati ya kuimarisha elimu, ujuzi na ubunifu kwa maendeleo ya Taifa.
Amesema Wizara pia ina mpango wa kuwezesha ubunifu kufikia hatua ya kibiashara ili mawazo na bidhaa zinazotengenezwa na wanasayansi na wabunifu ziweze kuingia sokoni na kuleta manufaa ya kiuchumi.
Kwa mujibu wa Nombo, hatua hiyo itasaidia wabunifu kunufaika na kazi zao huku ikichangia ukuaji wa uchumi na maendeleo ya Taifa.
COSTECH: Ubunifu unaweza kuwa chanzo cha ajira
Kwa upande wake, Mwenyekiti wa Tume ya Taifa ya Sayansi na Teknolojia (COSTECH), PROFESA John Kondoro, amesema ubunifu ni miongoni mwa maeneo yenye uwezo wa kutengeneza ajira kwa vijana na kutoa suluhisho kwa changamoto mbalimbali zinazowakabili wananchi.
Amesema COSTECH inaendelea kusimamia mashindano ya ubunifu, ambapo washindi watapatiwa tuzo wakati wa maonyesho hayo.
Kondoro ameongeza kuwa COSTECH pia inawawezesha wabunifu kifedha na kushirikiana na taasisi za elimu ya juu, ikiwemo vyuo vikuu, ili kuwasaidia wabunifu kuboresha bidhaa na mawazo yao kabla ya kuyaingiza sokoni.
Elimu, ujuzi na ubunifu ni msingi wa maendeleo
Maonyesho ya Wiki ya Elimu, Ujuzi na Ubunifu yanaendelea kutoa jukwaa kwa wadau mbalimbali kuonyesha bidhaa, teknolojia, ubunifu na fursa zinazoweza kusaidia kujenga kizazi chenye ujuzi unaohitajika katika dunia ya sasa.
Kwa Serikali, uwekezaji katika elimu, ujuzi na ubunifu unaonekana kuwa sehemu muhimu ya maandalizi ya kizazi kitakachoweza kutumia fursa za sekta mbalimbali na kushiriki kikamilifu katika maendeleo ya Taifa.