Dc Babati Amshughulikia Aliyefoji Nyaraka Kupora Ardhi Ya Mjane Magara.


Na John Walter-Babati

Hatimaye mkazi wa Kijiji cha Magara, Kata ya Magara, Wilaya ya Babati, Loema Petro, amekabidhiwa eneo lake la ardhi baada ya kulalamika kuporwa eneo hilo kwa madai ya kughushi nyaraka za umiliki.

Hatua hiyo imekuja baada ya Mkuu wa Mkoa wa Manyara, Martine Shigela, kupokea malalamiko ya mama huyo wakati wa ziara yake katika Kata ya Magara Oktoba 23, 2026, ambapo alieleza namna alivyopoteza sehemu ya ardhi aliyokuwa ameuza kwa mtu aliyefahamika kwa jina la Yohana Tluway.

Kwa mujibu wa maelezo yaliyotolewa, Loema alimuuzia Yohana robo ekari kwa shilingi laki moja na nusu mwaka 2012, lakini mwaka 2014, Yohana akishirikiana na aliyekuwa Mwenyekiti wa Kitongoji cha Korongo la Nyani wakati huo, wanadaiwa kughushi nyaraka na kuonyesha kuwa alinunua ekari moja badala ya robo ekari.

Akifuatilia malalamiko hayo, Mkuu wa Wilaya ya Babati, Hashimu Mgandilwa, alimtafuta Yohana, mkazi wa Kijiji cha Qatesh, Kata ya Gehandu, Wilaya ya Mbulu, na kumhoji kuhusu tuhuma hizo, ambapo alikiri kughushi nyaraka hizo, akaomba msamaha na kukubali kurejesha eneo hilo kwa mwenyewe.

Mkuu wa wilaya ameelekeza Yohana kufikishwa polisi kutoa maelezo kuhusu nyaraka hizo.

Akizungumza katika tukio hilo, Mgandilwa amesisitiza kuwa wananchi wanapaswa kufanya shughuli halali na kumiliki mali kwa njia zinazotambuliwa kisheria, akionya kuwa vitendo vya kuwadhulumu wengine havitavumiliwa na wote watakaobainika kujihusisha navyo watachukuliwa hatua kwa mujibu wa sheria.

Amesema vitendo vya aina hiyo ni miongoni mwa vyanzo vya migogoro katika jamii, akisisitiza kuwa kughushi nyaraka za umiliki wa ardhi ni kosa la wizi linalopaswa kushughulikiwa kwa mujibu wa sheria.

Chapisha Maoni

Mpya zaidi Nzee zaidi