Na Rebeca Duwe, Tanga
Mkuu wa Mkoa wa Tanga, Balozi Dkt. Batilda Buriani9, amewataka wananchi wa mkoa huo na mikoa ya jirani kujitokeza kwa wingi katika maonyesho ya Wiki ya Chakula yanayotarajiwa kuzinduliwa rasmi Oktoba 12, 2026, katika viwanja vya Shule ya Sekondari Usagara, jijini Tanga.
Maonyesho hayo ni sehemu ya maandalizi ya maadhimisho ya Siku ya Chakula Duniani, ambayo huadhimishwa Oktoba 16 kila mwaka.
Akizungumza na waandishi wa habari ofisini kwake kuhusu maadhimisho hayo, Dkt. Buriani alisema Tanzania inaungana na nchi wanachama wa Shirika la Chakula na Kilimo la Umoja wa Mataifa (FAO) katika kuadhimisha siku hiyo kwa lengo la kuhamasisha upatikanaji wa chakula cha kutosha na chenye ubora kwa watu wote.
Alieleza kuwa chimbuko la maadhimisho hayo ni mkutano uliofanyika mwaka 1979, ambapo suala la kutafuta njia na mbinu bora za kuhakikisha watu wote duniani wanapata chakula cha kutosha wakati wote lilijadiliwa.
Dkt. Buriani alisema kaulimbiu ya maadhimisho ya mwaka huu ni “Ubunifu wa Leo ni Lishe Bora ya Kesho kuelekea Dira ya 2050.” Alisema kaulimbiu hiyo inahimiza matumizi ya ubunifu, sayansi, teknolojia, utafiti na maarifa ya asili katika kuongeza uzalishaji wenye tija na thamani katika sekta za kilimo, uvuvi na misitu.
Aliongeza kuwa juhudi hizo zinalenga kuhakikisha upatikanaji wa chakula bora, salama, cha kutosha na chenye virutubisho kwa kizazi cha sasa na kijacho.
Aidha, alisema madhumuni ya maadhimisho hayo ni kuwawezesha wakulima, wafugaji na wavuvi kujifunza na kutumia teknolojia sahihi zinazoweza kuongeza uzalishaji wenye tija katika sekta za kilimo, mifugo na uvuvi, ili kila mtu apate chakula bora na salama kwa wakati wote.
Akizungumzia hali ya uzalishaji na upatikanaji wa chakula, Dkt. Burian alisema tathmini ya awali inaonesha kuimarika kwa hali hiyo. Hata hivyo, takwimu alizotaja kuhusu ongezeko la asilimia 133 na asilimia 130 zinahitaji ufafanuzi zaidi ili kubainisha kipindi cha tathmini na kiwango halisi cha ongezeko.
Vilevile, aliwashukuru waandaaji wa maadhimisho hayo kwa kuuchagua Mkoa wa Tanga kuwa mwenyeji wa maonyesho ya Wiki ya Chakula. Alisema maonyesho hayo yanatarajiwa kuzinduliwa rasmi Oktoba 12, 2026, na Naibu Waziri wa Kilimo na Uvuvi, Mheshimiwa David Silinde.
Kwa upande wake, Kaimu Mkurugenzi Msaidizi wa Ufuatiliaji wa Mazao na Usalama wa Chakula kutoka Wizara ya Kilimo, Theophod Ndunguru, alisema kuwa Siku ya Chakula Duniani huadhimishwa Oktoba 16 kila mwaka, huku maonyesho yakianza mapema ili kutoa fursa kwa wananchi kujifunza kuhusu masuala mbalimbali yanayohusu uzalishaji na upatikanaji wa chakula.
Ndunguru alisema kuwa maadhimisho ya mwaka huu yanajikita katika ubunifu, teknolojia na utafiti katika uzalishaji, usindikaji na usambazaji wa chakula, pamoja na matumizi sahihi ya chakula, kwa lengo la kuhakikisha kila Mtanzania anapata chakula cha kutosha, salama na chenye virutubisho.
Aliongeza kuwa upatikanaji wa chakula bora ni msingi wa afya njema, ambayo humwezesha mwananchi kuwa na nguvu na uwezo wa kushiriki kikamilifu katika shughuli za uzalishaji na hivyo kuchangia maendeleo ya taifa.
Aidha, alimshukuru Rais wa Jamhuri ya Muungano wa Tanzania, Mheshimiwa Samia Suluhu Hassan, kwa kuongeza bajeti ya Wizara ya Kilimo kutoka shilingi milioni 200 hadi shilingi trilioni 1.3, kwa mujibu wa maelezo yaliyotolewa.
Alisema hatua hiyo imeiwezesha wizara kuimarisha juhudi za kuhakikisha nchi inakuwa na chakula cha kutosha, huku akisisitiza umuhimu wa kuhakikisha chakula kinachozalishwa kinakuwa bora, salama na chenye virutubisho vinavyohitajika mwilini.
MWISHO